Við erum grasrótarsamtök íbúa sem þykir vænt um Kópavog og við viljum hafa áhrif til góðs. Við erum ekki tengd stjórnmálaflokkum og við erum ekki atvinnupólitíkusar. Við erum breiður hópur Kópavogsbúa sem höfum fylgst með hvernig tækifæri til að gera bæinn betri hafa glutrast niður m.a. með þéttingu byggðar á forsendum fjárfesta. Við viljum að skipulag og uppbygging bæjarins stuðli að samfélagi þar sem mannlíf blómstrar.

Sem íbúar höfum við mörg reynslu af erfiðum samskiptum við bæjaryfirvöld þar sem fólki er ekki sýnd virðing. Ekki hefur verið hlustað á eða tekið tillit til þarfa og óska íbúa þegar fjárfestum og verktökum hefur verið afhent skipulagsvaldið. Við leggjum áherslu á íbúalýðræði og að bæjarstjórn eigi ætíð að vinna að almannahagsmunum í umboði bæjarbúa. Okkur finnst minnihlutinn ekki hafa andæft yfirgangi meirihlutans síðustu ár.

Í gegnum samskipti við bæjaryfirvöld hafa mörg okkar komist að þeirri niðurstöðu að eina leiðin til að hafa áhrif til góðs sé að bjóða fram krafta okkar í bæjarstjórnarkosningum.

Við erum ekki með loforðalista. Við viljum standa við það sem við lofum. Ef við komum tveimur mönnum að, mun okkar fyrsta mál á dagskrá vera NÝTT AÐALSKIPULAG unnið í samvinnu við íbúa. Sú vinna gefur færi á góðu samráði við íbúa um hvernig áfram megi standa vörð um gott samfélag í Kópavogi og hvernig taka megi við nýjum íbúum í sátt við þá sem fyrir eru.

Listi Vina Kópavogs er fléttulisti karla og kvenna, á mismunandi aldri, með þekkingu og reynslu á öllum sviðum sveitarstjórnarmála s.s. kennslu, leikskólakennslu, íþrótta- og sundþjálfunar, þjónustu við aldraða og fatlaða, barnaverndarmálum, byggingum og verklegum framkvæmdum, menningar- og ferðamálum, sáttamiðlun, o.s.frv. Reynsla oddvita listans af opinberri stjórnsýslu og stjórnun og rekstri er ekki bara af sveitarstjórnarstigi sem borgarritari og bæjarstjóri í Fjarðabyggð, heldur líka sem ráðuneytisstjóri og í stjórn bæði Evrópu- og Alþjóðastofnana. Við teljum okkur kunna til verka í flestum þeim viðfangsefnum, sem sveitarstjórnir fást við. Í hópnum eru eldhugar sem sett hafa á stofn ný fyrirtæki og þróað skólastefnu sem nýtur viðurkenningar langt út fyrir landsteinana. Fólk sem sinnir fyrirtækjarekstri á ýmsum sviðum og fer með fjármál. Fólk af erlendum uppruna, sem hefur reynslu af því að setjast að á Íslandi. Margir hafa verið og eru virkir í frjálsum félagasamtökum eins og íþróttafélögum, skátunum, Rauða krossinum og víðar. Þetta er fólk sem býður fram krafta sína af væntumþykju og löngun til að vinna bænum sínum vel. Komist Vinir Kópavogs til áhrifa búa þeir yfir dýrmætri þekkingu og reynslu til að takast á við krefjandi viðfangsefni sem hvarvetna blasa við og innleiða fagleg vinnubrögð hjá bænum. íbúalýðræði er lykillinn að árangri og samstöðu í huga Vina Kópavogs. í því felst að kallað er eftir sjónarmiðum íbúa, hlustað á raddir þeirra og þeim svarað með virðingu.

Er þetta ekki bara óánægjuframboð vegna þess að einstaklingar í Vinum Kópavogs eru ósáttir við áætlaðar framkvæmdir í Hamraborg og á Kársnesi?

Samskiptin við bæjaryfirvöld voru hvatinn fyrir marga sem búa í Hamraborg og á Kársnesi til að verða Vinir Kópavogs. Það að hafa engin áhrif sem íbúi og kjósandi þrátt fyrir mikla vinnu og kostnað við að koma ábendingum á framfæri hefur valdið óánægju og djúpstæðum vonbrigðum margra íbúa. Það er erfitt að upplifa valdhroka bæjaryfirvalda og skeytingarleysi þeirra um að fara að lögum og reglum við þéttingu byggðar.

Því miður er það sem hefur valdið óánægju íbúa á Kársnesi og í Hamraborg að gerast (eða mun gerast ef ekkert er að gert ) í flestum hverfum bæjarins. Hentugt byggingarland Kópavogsbæjar er að verða fullskipulagt og því er þétting byggðar í grónum hverfum aðferð bæjaryfirvalda til að fjölga bæjarbúum, sem virðist vera meginmarkmiðið í skipulagsmálum. Erindi Vina Kópavogs er að vel verði vandað til þéttingar byggðar sem búast már við í öllum hverfum Kópavogs á næstu árum. Það felur í sér að ný byggð taki mið af eldri byggð, að samgöngur verði leystar samhliða og að fólk eigi aðgang að þjónustu í hæfilegri fjarlægð.

Á þróunarreitum hafa fjárfestar /verktakar fengið að ákveða uppbyggingu sem einkennist af æ hærri og þéttari byggð einsleitra, rándýrra íbúða (sjá t.d. Traðarreit Eystri og nýja byggð sunnan Smáralindar). Engar lausnir eru á vaxandi umferðarþunga og undir hælinn lagt hvort þjónustuþarfir nýrrar byggðar eru leystar. Þétting byggðar inn í íbúðabyggð sem fyrir er þarfnast nærfærins samráðs og samtals við þá sem fyrir eru og svara við spurningum um hvernig þarfir nýju íbúanna verða leystar í sátt við þá sem fyrir eru.

Það er líka hægt að skoða framboð Vina Kópavogs sem ánægju framboð. Við viljum nefnilega skipuleggja bæinn með því að byrja á því með íbúum að skoða það sem við erum ánægð með í bænum okkar, hvað við viljum halda í og hvað við viljum vernda og bæta. Við viljum leggja okkar að mörkum til að breyta vinnubrögðum og vera í liði með íbúum til að gera bæinn okkar betri.

Af hverju þarf að breyta aðalskipulaginu?

Aðalskipulaginu var breytt í árslok 2021. Þá var bætt við reitum á „þróunarsvæðum“ þar sem íbúðafjölgun byggist á tillögum fjárfesta um hvernig þeir vilja þétta byggð. Áherslan er á magn íbúða, umfram mannvist og gæði byggðar. Hver reitur er afgreiddur án samræmis við næstu reiti og því engin heildarsýn varðandi m.a umferðaraukningu. Þetta er óskiljanlegt því um árabil hefur fjölgun íbúa á höfuðborgarsvæðinu verið mest í Kópavogi, sem er langfjölmennasta bæjarfélagið á eftir höfuðborginni (39.000). Hvort heldur er í samanburði við Reykjavík, við sveitarfélögin á höfuðborgarsvæðinu eða á landsvísu þá fjölgar íbúum mest í Kópavogi. Land fyrir ný hverfi er nánast á þrotum og miklu minna en í nágrannasveitarfélögum. Á aðalskipulags tímabilinu er stefnt að fjölgun íbúa upp í 50.000 og talað um að það sé góð rekstrareining án nokkurs rökstuðnings. Vinir Kópavogs leggja megináherslu á skipulag sem tryggir gæði byggðar til að nýta sólarljósið og birtuna, koma í veg fyrir vindsveipi og tryggja viðunandi hljóðvist. Við viljum að fyrst sé skipulagt hvar þjónusta á að vera, hvernig hægt er að sjá fyrir samgöngum ekki bara einkabíla, heldur almenningssamgöngum og hjólandi og gangandi. Við viljum með nýjum vinnubrögðum skipuleggja vistvænt og mannvænt umhverfi og sinna nauðsynlegu viðhaldi í eldri hverfum bæjarins. Við viljum staldra við og fá íbúa með í að ákveða hvernig þörfum þeirra og bæjarfélagsins verður mætt.

Við viljum að orð og athafnir haldist í hendur, að skipulagið sé skýrt, skiljanlegt og fyrirsjáanlegt og að fólk viti hvaða ferli fara í gang ef breyta á skipulagi.
Það þarf að vera hægt að kalla yfirvöld til ábyrgðar ef þau samþykkja tillögur fjárfesta eða verktaka, að deiliskipulagi í andstöðu við íbúa. Einnig ef tillögur fjárfesta hafa í för með sér kostnað sem gæti fallið á alla bæjarbúa og ekki er gerð grein fyrir. Sem dæmi má nefna þrefalt gler í eldri byggð þar sem umferðarhávaði fer yfir leyfileg mörk eftir þéttingu (Traðarreitur) eða ef nýja uppfyllingu þarf til að hægt verði að aka, ganga og hjóla meðfram þéttingarbyggð við ströndina (reitur 13 Kársnesi) eða ef leggja þarf nýtt holræsakerfi, fyrir regnvatn og skólp, með sprengingum djúpt í bergið niður í Skeljabrekku og Vogatungu (Hamraborg/Fannborg). Kostnaður við þessar framkvæmdir til að tryggja uppbyggingu á reitunum hleypur örugglega á hundruðum milljóna eða milljörðum. Hann ætti að réttu að falla á þá sem njóta ávinnings af byggingarrétti en ekki á útsvarsgreiðendur almennt.

Framboðið er fylgjandi góðum almenningssamgöngum og vill Borgarlínu vegna áherslu á loftslags- og umhverfismál, lýðheilsu og skilvirkni. Borgarlína án samráðs við íbúa, sérstaklega við götur sem Borgarlínan á að fara um er ekki í anda Vina Kópavogs Samtal og skilningur íbúa á hvernig tekið verður á áskorunum vegna nýrrar Borgarlínu eru er mikilvæg forsenda að vel takist til. Valdboð og hroki, þegar íbúum finnst að sér og hagsmunum sínum vegið, mun bara leiða af sér dýran málarekstur fyrir dómstólum. Þurfi samninga við íbúa um breytingar á lóðum þeirra verður að ætla þeim sem standa að Borgarlínunni greiðslu þess kostnaðar.

Við gerum okkur grein fyrir að ekki er hægt að leysa núverandi vanda barna á leikskólaaldri með einni tiltekinni aðgerð. Verðum við í stöðu til þess, munum við leggja okkur fram um að greina hvaða ráð bærinn hefur á valdi sínu til að koma til móts við foreldra, sem eru í vanda. Við viljum hlusta á og taka tillit til mismunandi þarfa foreldra og barna þeirra og við viljum að foreldrar geti valið milli fjölbreyttra kosta. Við viljum að systkini geti verið á sama leikskóla en ekki þurfi að keyra þau bæjarenda á milli.

Með nýtingu lands undir einsleita íbúðabyggð og vannýttum tækifærum til að njóta náttúru og mannlífs er grafið undan rekstrargrundvelli bæjarins þegar til lengri tíma er litið. Á síðustu árum hefur íbúasamsetning Kópavogs breyst mikið. Eldri íbúar eru hlutfallslega mun fleiri en var þegar Kópavogur var bær barnanna. Æskilegt er að hafa jafnvægi í aldurssamsetningu og mikil umsvif og atvinnustarfsemi fylgir barnafjölskyldum. Útsvarstekjur, sem eru aðaltekjustofn bæjarins eru hluti af tekjuskatti launafólks. Skattur á fjármagnstekjur og arð rennur hins vegar óskiptur til ríkisins eins og virðisaukaskatturinn. Þeir eldri eru oft efnameiri og greiða vitaskuld útsvar af lífeyristekjum en af fjármagnstekjum greiða þeir skatt til ríkisins.

Eldra fólk hefur mismunandi þarfir eins og aðrir íbúar bæjarins. Íbúalýðræði þýðir að eldra fólk ekki síður en aðrir bæjarbúar þarf að geta haft áhrif á þjónustuna og aðstöðuna sem bæjarfélagið veitir. Mest hefur umræðan verið um hjúkrunarheimili og skort á þeim en ríkið ber ábyrgð á þeirri þjónustu. Það er mikilvægt að heimahjúkrun, sem ríkið ber ábyrgð á, og heimaþjónusta bæjarins vinni vel saman og markist af þörfum þeirra sem þjónustu njóta. En það er ekki síður mikilvægt að muna að fjöldinn allur af eldra fólki er í fullu fjöri og vill njóta tómstunda með öðrum. Í félagsstarfi fyrir aldraða gerir Kópavogsbær ýmislegt mjög vel og t.d. eru bæði sundleikfimi aldraðra og skipulagðir leikfimitíma til fyrirmyndar og allt slíkt viljum við styðja við. Í grunninn er það auðvitað þannig að eldra fólk eins og aðrir njóta þess best að við stöndum vörð um góða möguleika til gönguferða og útivistar á óspjölluðum náttúrusvæðum. Við viljum horfa til framtíðar og skoða hvernig best má þjóna íbúðabyggð þar sem margir íbúar núna eru á sjötugsaldri og verða komnir á níræðisaldur eftir 20 ár.